დღევანდელ ბლოგ-პოსტს ხელნაკეთი დანების ქართველ ოსტატებს ვუთმობთ. შეიძლება მათი ბიოგრაფია ბევრს ვერაფერს გვიყვება, მაგრამ ჩვენ თვალწინ იშლება შემოქმედება, რომელიც ყველა სიტყვაზე უფრო ძლიერად ამბობს სათქმელს. ამ ადამიანებმა ნიჭისა და საოცარი შრომისმოყვარეობის წყალობით, სრულყოფილებას მიაღწიეს. თითოეული ხელნაკეთი დანა უნიკალურია და არ მეორდება.
აჩი ტატუაშვილი - დაიბადა მანგლისში, 1988 წლის 15 მარტს. დაოჯახებული, ჰყავს ერთი შვილი. განათლებით გეოლოგი გახლავთ,
იყო დრო და პერიოდი, როდესაც ბევრი თავისუფალი დრო მქონდა. ყველაფერი კი იმით დაიწყო, რომ youtube-ზე ვუყურებდი, თუ როგორ ამზადებდნენ ხელნაკეთ დანებს. ერთ მშვენიერ საღამოსაც, ჩემი თავი გამოვიწვიე. ეტაპობრივად საჭირო ხელსაწყოებიც შევიძინე. მათ გარეშე არაფერი გამომივიდოდა. მიუხედავად იმისა, რომ ეს საქმიანობა ჩემთვის, როგორც ჰობი ისეა, ის უდიდეს ნებისყოფას და შრომას მოითხოვს.
დავით ბადუაშვილი - დაიბადა ქარელში 1972 წელს. ცივი იარაღებით, ბავშობიდანვე იყო გატაცებული, მაგრამ ოცნების რეალიზება ადრეულ ასაკში ვერ შეძლო, რადგან საბჭოთა კავშირში აღნიშნული საქმიანობა კანონით ისჯებოდა.
მივიწყებულ საქმიანობას, 12 წლის წინ დავუბრუნდი. ამაში ინტერნეტი ძალიან დამეხმარა. მისი მეშვეობით უამრავი საჭირო ინფორმაცია მოვიპოვე ხელნაკეთი დანების შესახებ. თავიდან, რა თქმა უნდა, როგორც ჰობი ისე დავიწყე, მაგრამ პირველმა დანამ, რაც არ უნდა პარადოქსი იყოს, დიდი მოწონება დაიმსახურა, ამან კი უდიდესი სტიმული მომცა. შემდეგ კი ისე წავიდა ჩემი საქმე, რომ ვერც კი შევამჩნიე, თუ როგორ მოვიწამლე ამ პროფესიით. საქმიანობა მას შემდეგ გავაფართოვე, როდესაც ხელნაკეთი დანის პირველი შეკვეთა მივიღე. ეს უკვე ნიშანი იყო იმისა, რომ ერთ საფეხურზე გაჩერება არაფრით შეიძლებოდა.
ზაქარია ბაკურაძე (ზენბანი) – 1978 წლის პირველ იანვარს, თბილისში, სამჭედლო ZENBAN-ის დამფუძნებელი, ოსტატი ზაქარია ბაკურაძე დაიბადა. ჰყავს მეუღლე და ორი შვილი. პროფესიით ეკონომისტი გახლავთ, თუმცა ფასდაუდებელი ხელნაკეთი დანების შექმნაში, ეკონომისტის პროფესიას ხელი არ შეუშლია. 2010 წლიდან აქტიურადაა ჩართული, ცივი-იარაღის წარმოების, თეორიული და პრაქტიკული შესწავლით.
დაგროვილმა ცოდნამ განაპირობა, ის რომ 2014 წელს, მცირე საწარმო ,,ზენბანი (ZENBAN)“ მოგვევლინა. დასახული მიზნების მიღწევაში, როგორც მასიური წარმოების, ასევე ინდივიდუალური შეკვეთების დასამზადებლად, ჩართულები არიან, როგორც დამწყები, ასევე პროფესიონალი ოსტატები და შეგირდები.
აღსანიშნავია ის ფაქტიც, რომ მნიშვნელოვანი ნაბიჯები გადაიდგა, ქართული ფოლადის ჭედვის, დაკარგული მეთოდოლოგიის, პირვანდელი სახის ადღგენა და ,,ბაწარაულის“ ტიპის ფოლადის (ე.წ. დამასკო-მაღალნახშირბადოვანი ფოლადისა და რკინის მავრთულების გრეხილი რბილ-მაგარი ფოლადის ჭედვითა და გამოწრთობით მიღებული კომპოზიტური მასალის) წარმოების დაწყების მიმართულებით.
